Katër futbollistë të një skuadre në Argjentinë, Velez Sarsfield, janë vënë në pranga në lidhje me një rast përdhunimi. Ata janë portieri Sebastián Sosa, mbrojtësi Braian Cufré, mesfushori José Ignacio Florentín dhe sulmuesi Abiel Osorio.

Arrestimi vjen pas një kërkese të prokurores publike María Eugenia Posse nga San Miguel de Tucumán, 1200 kilometra në veri të kryeqytetit Buenos Aires. Viktima u tha autoriteteve se më 3 mars ajo kishte rënë dakord të bashkohej me një nga lojtarët në një dhomë hoteli ku ishin të pranishëm tre burra të tjerë. Gruaja tha se kishte pirë alkool me lojtarët, e zuri gjumi dhe dyshohet se ishte përdhunuar.

Patricia Neme, avokatja e viktimës së dyshuar, tha për mediat argjentinase se Sosa kontaktoi klienten e tij dhe e ftoi atë në hotel. Portieri mohoi çdo keqbërje.

Sipas AP, Velez tha se kishte pezulluar kontratat e të katër lojtarëve pas arrestimit të tyre.“Ky klub nënvizon shqetësimin e tij më të thellë për faktet e raportuara, të cilat janë qartësisht në kundërshtim me parimet dhe vlerat e institucionit tonë”, thuhet në njoftimin e klubit.

The post Skandali në klubin argjentinas, 4 futbollistë arrestohen për përdhunim appeared first on ALBUK UK NEWS.