Deputeti demokrat, Ervin Salianji u kthye në selinë e PD pas dy vitesh, për të mbajtur një deklaratë për mediat pas vendosjes së liderit të opozitës në arrest shtëpiak.

Ai tha se goditja që po i bëhet Berishës ka për qëllim të mbjellë frikë, ndaj demokratët duhet të përgjigjen me bashkim.

“Prej dy vjetësh nuk kam hyrë në këtë godinë dhe jam kthyer sot qëllimisht dhe me përkushtim të plotë sepse sot më shumë çdo ditë tjetër duhet të jemi në krah të njëri-tjetrit.

Që ditën e parë që jam angazhuar në politikë, kam kërkuar para ligjit, por kthimi i heqjes së pandëshkueshmërisë si qëllim më vete, pa proces të pastër ligjor dhe kushtetues dhe pa prova të qarta dhe transparente, mund të jetë po kaq i rrezikshëm se pandëshkueshmëria, selektiviteti më i keq se të dyja bashkë.

Duhet ta themi qartë dhe pa mëdyshje se Shqipëria vuan dhe lëngon nga korrupsioni agresiv dhe i pashembullt i një qeverie që në 10 vite thuajse ka bërë batërdinë në çdo sektor dhe në çdo element të financave publike.

Ndërkohë që pritej goditje e korrupsionit të nivelit të lartë qeveritar, vjen lajmi për izolimin e liderit të opozitës.

Nxitimi dhe masa ndaj liderit të opozitës, Sali Berishës, është minimialisht joproporcionale, është kufizim i të drejtave politike dhe shkel të drejtën kushtetuese për të ushtruar funksionin e deputetit, duke i mbivendosur pushtetit legjislativ, pushtetin gjyqësor.

Kjo bën që të jemi në tejkalim të së drejtës dhe përforcon perceptimin për padrejtësi dhe selektivitet.

Liria ka simbolikat e saj dhe më kryesorja prej tyre është opozita.

Garancia për të pasur opozitë është garancia për të ushtruar të drejtat dhe liritë themelore të njeriut.

Lideri i opozitës është izoluar duke i hequr edhe të drejtën elementare të komunikimit dhe të shprehjes, dhe pa diskutim të ushtrimit të funksionit parlamentar.

Mijëra shqiptarë, demokratë dhe opozitarë, nuk janë të gatshëm që të dorëzojnë asnjë prej lirive të fituara në këto 34 vite, askush nuk do të jetojë në një sistem njëpartiak.

Goditja ndaj Sali Berishës ka për qëllim të instalojë një sistem njëpartiak përtej autokracisë që është instaluar në çdo institucion të këtij vendi, duke e bërë inekzistente ndarjen e pushteteve.

Goditja ndaj Sali Berishës ka për qëllim të mbjellë frikë dhe përçarje dhe ne duhet t’i përgjigjemi me bashkim me kurajo.

Demokratët janë dhe mbeten në këmbë për t’u përballur me këtë qeveri, siç janë përballur në vite, tanimë më të shumtë, edhe më të bashkuar.

Nëse ky izolim ka kërkuar të mbjellë përçarje dhe frikë, personalisht erdha këtu për t’u përgjigjur se do bashkohem dhe do përballem.

Bashkimi sot nuk duhet të vihet në diskutim dhe pas tij duhet të fillojë përballja me regjimin,” tha Salianji.

The post “Goditja ndaj Berishës ka për qëllim të instalojë një sistem një partiak”- Salianji: Ka ardhur momenti që të hedhim pas krahëve çdo problem të brendshëm dhe të bëjmë hapa… appeared first on ALBUK UK NEWS.